葉麗儀 星期六於澳門舉行嘅《葉麗儀感恩巡迴演唱會2025 - 澳門站》圓滿結束，呢位年屆77歲嘅殿堂級歌手，演唱會前已預告會獻唱《上海灘》原裝版本，當晚亦以呢首經典之作encore，仲同全場歌迷大合唱。
澳門站歌迷反應令Frances感動不已，澳門作為巡迴演唱會第三站，以「感恩」為主題，透過音樂回顧Frances入行55年嘅音樂旅程。佢又特別提到恩師顧嘉煇、黃霑、倫永亮同鮑比達等音樂大師，感恩佢哋嘅作品成就自己嘅音樂人生。
Frances亦獻唱演唱會主題新歌《感恩》，訴說55年來嘅心路歷程。之後仲向現場觀眾表示，《上海灘》一定要原汁原味唱，現場即時起哄同全場大合唱。1980年隨電視劇《上海灘》播出後，歌曲迅即成為家喻戶曉經典，更有趣係唔同網絡平台上亦有極多外國人曾試唱呢首廣東歌經典。有現場觀眾大聲讚Frances靚，她就笑言：「仲有幾個星期我就78歲，唔使請我食豆腐，總之你哋想聽我唱，我就會一直唱比你哋聽。」
澳門站完美落幕，而Frances巡演下一站正正就係上海站，原來Frances唱足幾十年《上海灘》，今次就係首次到上海開騷，令Frances充滿期待。
