單立文 近年因為處境劇《愛・回家之開心速遞》「熊樹仁」嘅搞笑叔公形象而深入觀眾心。擁有多重身分嘅豹哥其實係專業音樂人，曾為樂隊Blue Jeans成員，仲曾經係張國榮、梅艷芳、徐小鳳等巨星嘅御用樂手，而佢年輕時因為曾扮演過「西門慶」，亦成為一代人心中嘅經典「西門慶專業戶」。
現年66歲嘅豹哥保養得宜，而佢後生時擁有一副俊俏相貌，近日就有網民喺社交平台分享，豹哥喺1994年播出嘅劇集《千歲情人》截圖，仲話「西門慶/史公子 年輕時的顏值也是很猛的啊」，大讚豹哥年輕時期嘅樣同花美男一樣，擺喺現代嘅話絕對「好打得」可以揮低唔少小鮮肉，仲有人笑言豹哥係「改邪歸正」：「後生果陣又靚仔又邪，而家肥咗個樣善良咗」。
對於網民熱議，豹哥本人都喺Post留言回覆網民嘅欣賞：「大家過獎啦⋯⋯」隨即引起大批網民關注同踴躍留言，更有唔少人問豹哥，可唔可以做《中年好聲音4》嘉賓評判添！
