何雁詩與鄭俊弘（Fred）自從得知兒子鄭讚廷（Asher）確診患上罕見基因突變病「天使綜合症」後，除咗細心學習照顧阿仔，唔使開工嘅日子就親自接送阿仔返學放學，趁住放假嘅日子，兩公婆就帶阿仔游水鍛煉活動能力。
何雁詩噚日喺社交平台分享多張泳照，原來佢周末帶阿仔去玩水，見Asher全程玩得非常高興，喺爸爸Fred嘅陪伴下，努力喺泳池抓水，Asher不時笑逐顏開，留言寫道：「Nothing makes Asher happier than being in the water!（沒甚麼比在水中，更讓Asher開心了）」其實Fred早前受訪時曾講過要多啲帶阿仔游水，指阿仔喺水入面學識游，亦學識爬呢個動作，唔驚跌倒，加上Asher本身喜歡玩水，一見到水就著迷，又可以喺水裏面好自在郁動，所以玩水就係佢哋嘅最佳親子活動。
何雁詩同Fred早前帶阿仔Asher遠赴美國上為期3星期嘅治療課程，二人讚阿仔有明顯進步，而Asher由一歲半入紙申請幼稚園，今年終於等到政府S位特殊幼稚園學位，何雁詩透露Asher返學表現非常出色，好快適應校園情況，兩周後已經可以上6.5小時嘅課。
未知係咪展開校園生活後，阿仔Asher比較疲倦，有次睡夢中嘅親子肌膚接觸，卻令何雁詩瞬間感動，原來Asher一向對任何肌膚接觸非常敏感，牽手對Asher嚟講係一個巨大挑戰，每次何雁詩同Fred觸碰Asher嘅手或手臂，Asher都會推開，呢次Asher喺車上瞓咗，雖然係無意間牽著媽媽嘅手掌，但何雁詩就好珍惜呢個非常特別嘅時刻。
