吳浩康 身兼多職，既係歌手又係歌唱節目《聲秀》導師，更加係「職安真漢子」地盤技工。阿Deep為養家相當搏命，亦對《聲秀》學員嘅表現相當上心。不過繼同出局學員有爭拗後，阿Deep最近再被一位網民捉弄，好在有其他網友明白事理，紛紛為阿Deep發聲。
該網民喺社交平台貼出一段自己同阿Deep對話內容、截圖同錄音表示：「「俾吳浩康x 贏咗99%香港人😂唔好嬲啦牙deep 我知你都係眼紅我唱你首歌好聽過你 所以先至嬲嬲豬😭」，
從截圖可見，網民話想跟阿Deep學唱歌，問佢收費如何？由於阿Deep隔咗一日都冇覆，所以引嚟該網民連環追問「點解唔覆？」又問佢係咪正喺地盤開工。阿Deep以語音回應：「「唔好意思，我有嘢忙緊，同埋你凌晨打嚟問學唱歌，都未必咁快覆你。」
點知該網民繼續無禮攻擊，再發出兩段自己唱歌嘅錄音俾阿Deep，阿Deep就回應話：「唔好意思，你可唔可以唔好Send呢啲嘢嚟？我而家有嘢做緊，聽到電話響，聽吓你講乜嘢，點知你喺度唱歌，你想做乜嘢？」
其後該網民喺網上Po出呢段對話，態度仲頗為挑釁：「我知你都係眼紅我唱你首歌好聽過你，所以先至嬲嬲豬。」
可惜其他網民就認為佢咁樣騷擾阿Deep非常冇禮貌、唔識尊重，一致認為阿Deep態度好，可以忍住唔鬧人已經非常大量。而阿Deep本人都有喺該Post回應，並多謝講公道話嘅人：「我諗唔使我出聲，感謝大家！」