全新音樂遊戲節目《唱錢》日前進行面試，吸引到大批音樂發燒友嚟到挑戰，呢次節目有別於過往模式，着重嘅唔係情感唔係台風，參賽者嘅音準同埋拍子先係關鍵，作為主要持嘅森美同埋節目顧問Eric Kwok，今次終於唔使再做衰人，佢哋都話即刻開心晒。
森美話以前做評審，為咗節目效果要mean少少，如果唔係就會畀監製要求語氣再重啲，Eric Kwok就話有時想笑下都唔畀，所以成日要擺個惡樣出嚟，佢又解釋其實自己係好集中咁望住啲參賽者，但往往就係呢個樣令大家覺得佢好惡。森美就話今次交由電腦做評判，當中有一個即時嘅「專業音準分析系統」，參賽者一唱個系統就會話你知啱唔啱音，Eric Kwok同森美笑言今次係佢哋幫參賽者對抗個系統，希望參大家贏到更多獎金呀。
呢日嚟面試嘅參賽者當中，有歌唱比賽嘅常客，亦有為十萬獎金而嚟嘅，不過最奇怪嘅現象，就係大部分嘅參賽者，年齡都係介乎31至34歲。Eric Kwok就解釋因為呢個年齡層剛好喺《聲秀》同《中年好聲音》之間，森美笑言佢哋個節目又叫「尷尬好聲音」，因為大家嘅年齡段剛好喺呢個尷尬位。
參賽者Travis就話自己都想參加《聲秀》同《中年好聲音》，但因為年齡卡咗喺兩個節目嘅中間，所以參加唔到，而今次《唱錢》唔只年齡乎合，又有十萬獎金，所以相當吸引。
曾經參加《中年好聲音》並晉身100強嘅Aaron，呢次就話因為貪玩而報名《唱錢》。而同樣曾參加過唱歌比賽嘅Ika，就話比賽當然有贏有輸，輸咗檢討後味再參加。
