關智斌 一連兩場演唱會圓滿落幕，操出一身健碩肌肉嘅Kenny喺個唱上大騷成果，好似空中Pole dance嘅高難度動作，令台下觀眾尖叫連連。Kenny喺第一場大玩街頭健身架，不過喺第二場時就唔小心失手，Kenny就話一切要怪自己，因為第一場完美演出，所以第二場過於興奮先會失手，自己覺得好遺憾，令呢晚演出不夠完美。但好在Kenny練「股」有道，用個蜜桃臀頂住，所以先冇受傷。
Kenny嘅兩晚演出都有唔少圈中朋友到場支持，第二晚連好少公開睇騷嘅謝霆鋒都係座上客。有霆鋒呢位大師兄捧場，都令Kenny話好榮幸。而Kenny今次演唱會嘉賓陣容都好有驚喜！繼第一晚嘅鄭希怡、薛凱琪、龍虎豹容祖兒、蔡卓妍同鍾欣潼，第二晚就請到大隻仔代表Tyson Yoshi。
Kenny同Tyson兩位大隻仔同台，一眾粉絲都忍唔住起哄要兩位除衫，不過Tyson就話除衫要睇場合，因為做後輩要識分莊閒。
講起第一晚Joey喺台上爆喊，Kenny就覺得溫馨得嚟又有少少搞笑，仲話「邊有人上台做嘉賓會喊架？通常都係喺自己個騷先會喊。」Kenny話Joey最近好感性，上次一齊做戶外騷時，Joey都係突然落淚。
第二晚演出因為場地原因，原定Kenny會再唱一首《眼紅館》先會完騷，但最後無奈刪除。不過見到滿場觀眾唔捨得散場，Kenny都重新返台上向大家致意，亦哼唱咗幾句《眼紅館》，承諾下次會更努力，期待同大家再見。