薛家燕 龔慈恩 同 林愷鈴 應澳門政府旅遊局邀請合作短劇，龔姐同Ashley母女合作之餘，4集短劇中佢哋亦同家燕姐飾演同堂三代，故事中「嫲嫲」家燕姐到澳門尋找初戀男友引發連番趣事，介紹跨代旅遊好去處探索社區深度遊。結局篇仲請來《十月初五的月光》中飾演家燕姐舊情人嘅 郭鋒 ，客串擔演「嫲嫲」初戀男友，兩人相隔多年後再於澳門合作，成為《十月初五的月光》「Re-U」。
2000年播映嘅經典劇集《十月初五的月光》於澳門取景拍攝，當年贏盡口碑收視，除咗主角 佘詩曼 同 張智霖 大獲好評，「Q姨」家燕姐同舊情人「祝展輝」郭鋒嘅戲份，亦令觀眾津津樂道。
今次兩人再重返澳門合體，家燕姐就話：「2000年合作《十月初五的月光》，2015年再合作《十月初五的月光》電影版，所以上一次合作已經係2015年。」相隔十年再度周框，家燕姐指郭鋒依舊熱情、感覺非常親切，而郭鋒就笑言自己同往時大有不同：「舊時好多頭髮，後生冇咁肥，而家肥咗。」
郭鋒仲笑言被家燕姐打動而首肯客串，家燕姐就補充話：「故事講我要喺澳門搵初戀情人，播咗幾集，好多人問邊個飾演我初戀情人。我就諗喺澳門拍《十月初五的月光》有個人做我情人，不如請返佢。呢套劇好多人睇過，好大回憶，於是我就嘗試打畀郭鋒，請佢客串初戀情人。佢好賞面令到大家都好開心，對整套劇嚟講，係大家都好期待見嘅嘢。」
難得再到澳門拍劇，家燕姐話：「唔知點解拍攝時候，個個街坊都當我哋好似親戚咁，好熱情咁打招呼。鋒哥話想請我去食乳鴿同魚翅，而家澳門變得好繁榮同國際化，但又保留古代歷史文物，係一個好值得嚟嘅地方。」
而郭鋒仲話澳門係自己人生首次出埠之地：「細個時剛讀完書，啱啱攞到身份証，第一個出埠到嘅地方就係澳門，當年同朋友一齊坐船，當年嚟澳門坐船要坐3個半鐘。」
