2020年港姐冠軍 謝嘉怡 雖然少咗喺幕前同大家見面，不過佢嘅生活就依然精彩，近期佢就喺社交平台以長文同大家update自己近月嘅生活點滴。
Lisa分享咗一系列靚相，好似慶祝30歲生日、返鄉下英國度假、又同侄女去倫敦睇演唱會，以及跑完人生第一次10K長跑等，大部分相片中嘅Lisa都脂粉未施，即使素顏依然狀態一流。
當中最特別嘅，可能係Lisa為14歲嘅愛犬Leo慶生，相信對Lisa嚟講彌足珍貴。事關Lisa去年12月，帶三隻狗散步期間，狗狗誤食毒肉，其中兩隻愛犬中毒喪命，只得Leo大難不死，歷經大半年休養，Leo已全面恢復健康，可以幫Leo慶祝生日，相信對Lisa嚟講比任何嘢都珍貴。
