由 劉偉強 同 麥兆輝 執導，周杰倫、陳冠希等主演，改編自日本人氣漫畫嘅電影《頭文字D》，今年上映轉眼滿20週年。電影公司特別推出4K修復版重返大銀幕，兩位導演以及為電影配樂嘅 陳光榮 作客《StatTalk》，同大家分享當年拍攝電影背後嘅趣事。
劉偉強透露當年自己完全唔識邊個係周杰倫，電影公司老闆要求佢飛去台灣casting，搞到佢心生不滿。而麥兆輝就透露當年陳冠希原係藤原拓海嘅人選之一，但因為周董性格同拓海較為接近，所以敲定由佢飾演拓海。
電影中有大量飛車場面，麥兆輝透露其中一場甩尾戲，杰倫要求親身上陣，但最後不慎炒車，劉偉強大爆杰倫當時嚇到面都青埋，佢唯有以另類搞笑方法安慰對方。
當年戲中女主角搵來青春無敵嘅日星女性 鈴木杏 演出，不過佢又抽煙又援交嘅人設令大批漫畫迷大跌眼鏡，劉偉強更加碼自爆當初麥兆輝要求自己扮演女主角嘅「sugar daddy」，不過為顧及形象唯有拒絕，爆笑內容搞到主持 王鎮泉 笑到肚痛。
