萬眾期待嘅新劇《巨塔之后》正式喺翡翠台播出，一眾演員同幕後同事齊集電視城欣賞劇集首播。能夠再次聚首一堂兼且一齊睇劇，大家都表現得相當興奮，首次參與TVB劇集演出嘅 鍾鎮濤 ，仲上台分享睇完首集嘅感受，B哥哥大讚劇集人物豐富，好有追看性，宣萱就預告第二集開始會越來越精彩。
宣萱同B哥哥睇返喺布拉格古堡拍攝嘅婚禮重頭戲，即刻勾起當日拍攝嘅回憶，宣萱話嗰場婚禮戲係自己演戲30幾年來拍過最華麗嘅婚禮，甚至出動埋直升機。
蕭正楠 就話喺布拉格嘅拍攝冇乜夜戲，收工後就相約 馬國明 一齊鋸扒食飯，兩人仲會傾吓男人心事，而 陳展鵬 亦話喺布拉格見到滿天星空，覺得好浪漫。
吳若希 喺劇中因為老公馬國明嘅離世，要努力保護自己嘅地位同權利，同好多人都有對手戲，仲周旋喺宣萱同 陳煒 之間，相信對演技都係一大考驗。
《巨塔之后》今晚起星期一至五 20:30 翡翠台