無綫電視再度揚威亞洲，於「2025亞洲影藝創意大獎」 (中國香港地區)中奪得13 項殊榮，當中涵蓋劇集、綜藝節目、新聞及資訊內容節目等，而所有獎項亦自動入圍角逐亞洲地區冠軍大獎。
去年憑《反黑英雄》喺《萬千星輝頒獎典禮 2024》中勇奪視帝嘅張振朗，今次憑劇集《奪命提示》再奪「最佳男主角」；至於喺《刑偵12》中演活因長期飽受折磨而變得冇靈魂嘅傅嘉莉，則憑此劇首奪「最佳女主角」。
對於能夠首奪視后，Kelly坦言當fans同佢講呢個消息時，自己都唔敢相信，直到鍾澍佳總監製同佢講，Kelly先知係真：「首先多謝大會， 亞洲影藝創意大獎，同埋多謝大家支持，今次係我第一個女主角獎，好開心亦都好感恩、好感動。首先第一個最大感受，一定係好多謝佳導，我這幾年拎嘅所有獎都係因為佢，多謝佢和編劇畀我咁好嘅角色，我真係好鍾意楊芷菲呢個角色，我會繼續努力，珍惜每一個演出機會，做得更加好。」佢又指期待《刑偵12》之後可以奪得更加多獎，同時亦恭喜陳自瑤奪得「最佳女配角」，而劇集主題曲亦奪得「最佳主題曲」。
至於去年年尾憑《異空感應》而贏盡好評嘅阮浩棕，亦成功憑該劇奪得人生首個演技獎項「最佳男配角」。對於演技被受肯定，阮浩棕表示幸福嚟得好突然：「本身都冇諗過自己有份角逐呢一個獎，依家仲要攞到香港地區最佳男配角嘅認可、更加係一個好大嘅鼓舞，成個感覺好唔真實。之後我會繼續努力、以後嘅演出都要對得住呢一份認可。」
由新晉幕後製作人林瑋澄監製嘅《奔跑吧！勇敢的女人們》，除咗令吳若希榮獲「最佳喜劇演員」外，劇集亦同樣獲得「最佳喜劇節目」殊榮。而車婉婉則憑《中年好聲音》系列嘅主持工作，奪得「最佳娛樂節目主持」。
最佳男主角：《奪命提示》張振朗
最佳女主角：《刑偵12》傅嘉莉
最佳男配角：《異空感應》阮浩棕
最佳女配角：《刑偵12》陳自瑤
最佳喜劇演員：《奔跑吧!勇敢的女人們》吳若希
最佳喜劇節目：《奔跑吧!勇敢的女人們》
最佳主題曲/主題音樂：《刑偵12》片尾曲《我和我們》
最佳娛樂節目主持：《中年好聲音 3》車婉婉
最佳音樂/舞蹈節目： 《中年好聲音 3》
最佳綜合娛樂節目：《江湖見》
最佳資訊娛樂節目：《養生之旅》
最佳品牌節目：《寵你一世》
最佳紀錄片系列：《無窮之路 IV – 一帶一路》
