許冠文呢日現身中大醫學院出席對談會，分享對生死嘅睇法，佢更分享當年喺泰國潛水時，爭啲被鯊魚攻擊嘅經歷，Michael憶述當時喺朝早六點幾，自己一個去沙灘外打算浮潛睇下珊瑚，點知就遇到一條十幾尺長嘅鯊魚，由於當時距離沙灘百幾碼，即使打算游走，都有被鯊魚追上嘅風險。
Michael指當時自己最大嘅反抗，就只可以用力𨅝佢一腳，而當條鯊魚慢慢收窄個範圍時，Michael就突然有死亡逼近嘅感覺，佢指喺面對死亡嘅兩、三分享入面，腦海中出現咗幾個人樣。
對談會後Michael表示當大家以為「阿媽同老婆跌落海會救邊個先」呢個問題係冇答案時，但喺佢面對過死亡後，先知答案其實早就喺潛意識入面，不過當傳媒問到佢被鯊魚圍嘅當下，腦海中係浮現出太太定囡囡個樣時，Michael就笑而不語。
現年83歲嘅Michael，表示對生死呢個課題睇得好化，尤其喺佢拍完《破。地獄》後，喺呢方面就有更深嘅領悟，佢笑語人生苦短，自己都就快落車，所以最聰明嘅做法就係好好欣賞沿途風景，當中包括環境同身邊嘅人，Michael形容唔識珍惜真係好苯。
提到《破。地獄》將角逐第98屆奧斯卡金像獎「最佳國際影片」，Michael話雖然勁敵當前，但佢對呢部電影好有信心，仲話奪獎都未必係無可能。