龔嘉欣 譚凱琪 林淑敏 許家傑 李佳 同 沈宗賢 參與「TVB愛心義工隊」舉行嘅「愛在中秋」活動，大家一齊同老友記歡聚預祝中秋。佢哋除咗同一眾老友記做健身操、玩遊戲兼大派中秋福袋，李佳同沈宗賢更悉心挑選歌曲獻唱，令現場氣氛非常熱鬧。
嘉欣話好多人覺得做善事係幫人，其實剛剛相反，因為係幫緊自己，好似自己平日好少機會早起身，而今次為咗參與活動，就一早起身同老友記做健身操，過咗愉快一日。Zoie就話最開心係玩咗好多兒時遊戲，好似「收買佬」，全場氣氛好開心。
嘉欣榮獲TVB「2025下半年傑出員工嘉許計劃」得獎者之一，佢直言係受寵若驚，因為要得到呢個獎係絕對唔容易，因為要見評審經過面試，佢話自己前一晚係緊張到失眠，因為唔係自己接觸嘅範疇。
林淑敏同許家傑都係義工隊嘅常客，而每次參與活動，佢哋都話被老友記嘅魄力所感染，更加喺對方身上得到無限歡樂。佢哋又感激公司嘅義工隊出心出力，許家傑話好多同事都係將自己放假嘅時間拎嚟行善，好值得敬佩。
