武打巨星成龍一向愛錫圈中後輩，佢與容祖兒早前出席2025大灣區電影音樂晚會獻唱，近日喺社交平台瘋傳一條影片，見身穿大露背裝嘅祖兒，坐喺成龍旁邊，成龍疑出手掃祖兒玉背，掀起爭議，
影片見成龍與祖兒坐喺同一張枱，兩人聊天期間，成龍放喺椅背嘅手，疑由祖兒美背掃至膊頭，輕拍兩下，而老闆楊受成隨後企起身，跟祖兒調位，影片瘋傳後惹來熱議，網民盛讚楊生舉動係「好老闆」，另有網民指拍片者係捕風捉影。
祖兒經理人霍汶希（Mani）亦有回應此事，指當時楊生想與王力宏及肖戰影合照，本身祖兒坐喺肖戰隔籬，楊生就坐喺成龍旁邊，二人對調座位，楊生合照後兩人就坐回自己座位，Mani又指大哥睇住祖兒長大，「一個非常gentleman嘅人」，強調活動當日座位已固定，椅背上有上貼名字，指呢個只係一場美麗嘅誤會。
