農夫同麥玲玲師傅喺廣州聯合開騷，兩場演出都全場爆滿，呢個結合咗演唱、Talk騷，同即場睇相嘅演出，相當新穎突破，連玲玲師傅都有特別練歌，獻唱返三人合作嘅嘅經典歌《風生水起》。
農夫亦大碌人情卡，繼前一晚請到張繼聰任嘉賓後，呢晚請到王菀之，玲玲師傅仲專程去練Ivana嘅金曲，一邊唱一邊Tag Ivana出場，相當有誠意。不過C君就笑玲玲師傅好勁，因為唱到一首流行曲變粵曲。
當反應快嘅C君同陸永遇上講嘢天馬行空嘅Ivana，差啲都無法招駕，三人妙語連珠令台下觀眾笑唔停口。
完騷後，農夫同玲玲師傅都話呢個演出非常新穎突破，但聽玲玲師傅唱歌先係最大娛樂。演出唔只加場令三人驚訝，仲撞正林峯開騷，但反應仲咁好，令佢地都好開心。
