有近兩星期冇更新社交平台嘅 鄭秀文Sammi ，2號晚上載咗一段佢坐喺輪椅上畀人推去做檢查嘅短片，原來Sammi早前做gym時，唔小心整傷咗後腰，佢喺帖文中表示：「當時找不到自己比較相熟的骨科醫生，就去了跌打。但由於痛持續, 後腰實在太重要，還是徹底照照MRI比較安心，對症下藥。MRI報告原來撕裂了兩處，難怪如此痛。」
為免大家擔心，Sammi表示自己冇傷及腰間盤，至於坐輪椅嘅原因，係因為距離照MRI嘅地方有啲遠，護士為免佢傷上加上，所以即使佢可以行到，但都建議佢以輪椅代步。
由於受傷嘅原因，Sammi有啲行程只好取消，而經過十多日喺屋企嘅靜心休養，佢後腰已經好返好多，終可回復正常活動。嚟緊佢會慢慢做返啲運動，同埋追返同 張敬軒 下月頭個騷嘅排練進度。
Sammi呢個Po一出，就有唔少圈中人留言慰問，而軒公亦有留言：「Dear Sammi，唔好擔心, 健康第一 ❤️ 要休息好, 同埋食返多啲嘢呀🐷 🥰」
