50歲張玉珊驚爆男友已經求婚 兩人三觀相近喜與繼女相處

張玉珊前年受訪時承認於疫情時與盧啟賢發展，近年Shirley不時與男友出席朋友聚會，周遊列國享受生活。近日Shirley接受方健儀嘅網上節目訪問時，除咗傾談事業及人生，更談及感情事，Shirley大方公開男友已經求婚，而成件事係正常地進行。

50歲Shirley喺節目中更分享兩張疑似喺歐洲影嘅結婚相。佢話跟男友拍拖以來都相處融洽，兩人三觀相近，可能年紀相若，好多事嘅睇法同興趣都接近。談到男友跟前妻育有一女兒，Shirley話佢哋好有父女相，而女兒係「靚版盧啟賢」，一向鍾意小朋友嘅Shirley自言彼此相處好好。

對於男友過去曾被批評，Shirley高調護愛，佢話：「第一係佢唔識得應對傳媒；第二係我都替佢不值，仲有我覺得氣憤。如果我係佢，我會俾佢反應大好多。第三就係我不會喺任何人唔好嘅時間去避開，所以對我嚟講，我覺得兩個人一齊就等於係同一隊，當時對我哋係幾大嘅衝擊。」兩人經過此事更加互相了解，令關係更穩固，Shirley指事件維持咗半年，自己好欣賞男友好有承擔，男仔最重要係有擔當、唔好氣餒。

Shirley多年嚟營商同投資有道，手上擁有不少豪宅物業，估計市值達3億港元，Shirley於2003年時成為香港最年輕上市公司主席，話從未提過自己有幾多身家，但現時過住自己想過嘅生活，亦做到「三分一時間做投資、三分一時間做慈善，三分一時間做自己想做嘅事」。