楊祐寧榮升三寶爸略顯疲態 照顧患癌父親忙到兩頭煙

楊祐寧上個月第三度做爸爸，呢日佢與張軒睿及郭雪芙一齊宣傳新片，楊祐寧略顯疲態，既要照顧啱啱出世嘅細仔又要照顧患癌嘅父親，楊祐寧忙到兩頭煙，加上陸續幾部作品準備上映，楊祐寧有啲分身不暇。

楊祐寧透露家人嘅狀況都可以，大家保持一個信心，問到做三寶爸喺育兒方面係咪得心應手，楊祐寧指心態上冇咁緊張，笑指鼓勵藝人朋友要多生小孩，即問身邊兩位拍檔，張軒睿及郭雪芙則笑住話「還未」。

楊祐寧新片題材取自台灣一個經典詭異童謠，未上映已牽起話題，佢哋講起呢首歌都有啲毛骨悚然，楊祐寧更笑言自己唱任何一首兒歌畀阿女聽，阿女都覺得偏恐怖。楊祐寧監製及主演《今夜一起為愛鼓掌》有份角逐金鐘獎戲劇節目男主角，楊祐寧嘅演技得到肯定，佢都覺得好鼓舞，又指拍攝過程好開心。