視帝朗澳洲遇偶像合照變小Fans 與陳煒參與活動慶中秋佳節

日前先獲「2025亞洲創意大獎」最佳男主角嘅 張振朗 近日飛到澳洲墨爾本，參與當地舉行嘅中秋晚宴同當地觀眾預祝佳節，當地時間星期日佢亦會再現身悉尼，同 陳煒 一齊出席另一中秋嘉年華，早前兩人更拍片準備一嘗當地唔少知名美食。

而Owen於澳洲仲遇上佢嘅偶像，目前效力澳洲職籃新南威爾斯伊拉瓦拉鷹隊嘅前NBA球星麥基(JaVale Lindy McGee)。Owen曬出與呢位3屆NBA兼東京奧運金牌得主嘅合照，化身小Fans嘅佢仲寫道：「究竟喺機場撞到一位籃球明星嘅機率係有幾多呢？Mcgeeeeeeeee🥳So happyyyy today~~~~題外話：原來佢細我一年😏😂」

而老友何廣沛仲即時留言話：「呢個高度，你好可愛😂😂😂」，Owen就回覆：「我覺得自己似啱啱出世😂」企喺身高213cm嘅麥基旁邊，又的確令算幾大隻嘅Owen都成為小朋友身形嘅。

而Owen雖然飛抵當地食唔少好嘢，不過限時動態就見佢仍然保持運動，空餘時間仍到健身室運動，又貼出裹眺悉尼歌劇院嘅靚相，非常寫意。