劉佩玥 近期接連有劇集推出，先前喺《俠醫》中出演嘅阿Nat衰到入心入肺，近日再喺熱播劇《巨塔之后》飾演 文以珈 又係另一種味道，喺唔同角色中發揮唔同水準演技。
阿Moon今次係《巨》劇中，一開場冇耐就面對老公 蕭正楠 同兒子離世，一場冒雨抱屍崩潰嚎哭戲見者心酸，同時亦獲觀眾大讚演技進步。接落嚟文以珈獨力同繼女樂珈嘉相處遇上仲會唔少波折，角色漸漸由少奶奶強化，想知佢留喺王氏家族嘅鬥爭就要緊貼每晚精彩劇情喇。
阿Moon呢段時間一直忙住劇接劇宣傳，加上兩個角色對比鮮明，令觀眾對阿Moon作出唔同評價，經過演技磨練嘅佢獲觀眾認同，阿Moon亦深深感受到粉絲嘅愛戴，特意出Post多謝大家。雖然係一輯舊照，但見阿Moon神采飛揚笑得好甜蜜，唔少眼利網民一眼就睇出呢輯相喺檳城留倩影，阿Moon留言：「玖月匆匆一眨眼來到十月了，一直在忙，一直感恩，感謝大家一直的支持和愛護，俠醫和巨塔之后相繼播出常常宣傳跟大家見面，收到大家的意見和鼓勵，很感激，謝謝你們。」一眾粉絲紛紛送上鼓勵，不忘讚美阿Moon喺劇中嘅演技。
《巨塔之后》星期一至五晚 20:30 翡翠台