金馬影后 張艾嘉 監製、香港新晉導演 龔兆平 執導； 許光漢 同 袁澧林 主演嘅奇幻愛情電影《他年她日》（Measure in Love）上映兩日票房已突破100萬港幣。新片除「光林CP」外，亦包括陳澤耀、董瑋、陳輝虹、韓佩瑤、駱振偉、許恩怡、謝咏欣等聯合演出。
新片團隊一直馬不停蹄到唔同地方同Fans見面，男主角許光漢近日就喺台灣出席謝票場，佢又提到：「拍完這部電影，讓我更懂得珍惜時間與眼前的人，希望大家看完也能珍惜當下，並將感動分享出去。」；而女主角袁澧林亦鼓勵觀眾話：「放開想像力，大家可以用感性嘅心情去體驗呢段特別嘅愛情。」監製張姐就強調：「《他年她日》唔止係愛情電影，仲涵蓋友情、親情等多重情感，希望觀眾喺各個層面都可以獲得共鳴。」
片中飾演薯仔嘅許光漢由年少到成熟甚至年華老去，係從影以來橫跨最大年齡層角色，戲中佢傾盡一生癡心守候袁澧林飾演嘅命定情人安晴，真摯打動人心，吸引唔少圈中人大力推薦，曾同光漢於《想見你》成為CP嘅柯佳嬿仲祝福話：「薯仔會一直是安晴記憶中的那個少年。祝票房大賣，重力不再。」而曾參演《華燈初上》嘅光漢好友章廣辰就幽默指：「看完決定留一顆薯仔頭造型，留在這個時間裡。」
至於曾同Angela喺《過時·過節》結片緣嘅影后 毛舜筠 亦出post力撐，指新片感動到流下眼淚：「我特別喜歡Angela同許光漢嘅演出，不溫不火但流露出內心深處隱藏住嘅熾烈愛意同傷痛。Angela喺碼頭彎身痛哭一幕，我嘅眼淚都跟住流出嚟。」毛姐曾同導演龔兆平喺《阿媽有咗第二個》合作，愛錫後輩嘅毛姐大讚：「小平（龔兆平）係我認識中嘅超班副導演，今次終於能夠有自己心血作品，我完全明白同感受到佢開映前嘅興奮同激動。」
早前曾同Angela合作《窄路微麈》嘅張繼聰同太太謝安琪一同欣賞新戲，佢話：「拍得好靚，同愛人一齊睇浪漫指數加乘。」；Kay就大讚電影浪漫：「感受到感情中兩個人一致嘅心。」；Angela兩位好友余香凝同廖子妤亦專誠捧場。
電影公司亦公開由《破·地獄》金像得主 朱芸編 同 林俊傑 聯手製作，JJ深情獻唱嘅電影主題曲〈瞬間的瞬間〉MV，畫面結合電影場景意象，加上由金像獎美術指導得主兼《他年她日》製作及藝術總監文念中執導，能夠讓觀眾邊重溫戲中動人情感，邊沉醉於音樂餘韻。
JJ表示：「我自己很喜歡《他年她日》的題材和概念，透過音樂打開自己對於感性的那道門，也希望透過音樂讓電影更生動。這部電影我覺得需要一點想像空間，因為它是一段奇幻的旅程，每次唱到副歌的第一個字『愛』的時候，就好像穿過電影的重力牆，每次跨越就是一個挑戰，就是一個新的旅程，也是一個愛的象徵。」