周吉佩 近日飛到加拿大，出席分別於三大城市舉行嘅中秋音樂晚宴，同觀眾一齊迎接中秋佳節，反應超級熱烈。吉吉先後走訪溫哥華、卡加利同多倫多，為移居當地嘅朋友落力演出娛賓。佢仲趁此行同港姐老婆 黃彥欣 拍拖享受二人世界，一抵達更相約當年參選港姐嘅佳麗好友張嘉兒同周美欣敍舊，幾位靚女一見面就雞啄唔斷。
吉吉今次為加國歌迷準備全新演出歌單，自彈自唱之集又同大家近距離互動，最後仲同《中年好聲音4》溫哥華站海選師弟妹合唱，齊齊預祝中秋。大會仲準備蛋糕為即將生日嘅吉吉搶先慶祝，現場觀眾一齊唱生日歌，為佢送上祝福。
吉吉同太太寓工作於娛樂，偷閒遊覽又喺楓樹下手執楓葉合照留念，佢仲話：「估唔到温哥華有咁多人支持自己，去到大型超市同夜市行街，都有好多香港朋友揾我合照。」
完成温哥華演出後，吉吉翌日就馬不停蹄飛往卡加利，抵達當地就即晚演出，雖然略帶倦意，但因為當地觀眾非常投入，令吉吉樂此不疲，演出保持水準。事後當地電台更力讚吉吉演出值100分。
吉吉話：「好開心晚宴中遇到好多喺香港合作過嘅朋友，遺憾未有時間同佢哋食飯，希望有機會再嚟加拿大開演唱會。」
而最後一站多倫多反應更為熱鬧，吉吉演唱幾首自己歌曲之餘，又同過千觀眾大合唱多首經典金曲。快歌環節全場觀眾更一齊跳舞，場面震撼。最後更吉吉自彈自唱《情非得已》為多倫多站畫上完美句號。
呢次演出，仲吸引到60年代影星凌波同金漢、演員于洋到場欣賞，吉吉又同佢哋合照留念，凌波仲大讚吉吉唱得好又靚仔，令吉吉開心不已。吉吉更獲當地政府頒發感謝狀。完成加國之旅吉吉已返港，出席歌迷會舉行嘅生日派對外，又準備錄製新歌，又將會同 張與辰 往馬來西亞工作。
