羅毓儀 喺《女神配對計劃》後同 林俊其 發展成情侶，正經歷最甜蜜嘅熱戀期．Yuki呢日出席一個美容院開幕活動，見佢笑得咁甜，就知佢同Kris嘅拍拖生活相當之順利，Yuki透露兩人有進一步了解，佢更發掘到Kris唔少優點，大讚相當體貼，係位Sweet Boy(暖男)。
Kris唔止時刻會留意到Yuki嘅需要同小狀況，因為Yuki成日會頭痛，Kris不時會帶備頭痛藥，或者喉糖緩解Yuki身體嘅小毛病。Yuki希望喺拍攝節目上同Kris有合作，暫時兩人已計劃好萬聖節去主題樂園Cosplay約會，相信兩位嘅CP粉相當期待Yukris一齊打卡。
同場出席活動嘅仲有 姚嘉妮 ，嘉嘉一直對美容產品認知度高，不時開live做直播，最近仲獲得一個營商藝人獎，對佢嚟講好大鼓舞，佢好多謝遇上團結又熱心嘅團隊，令不可能嘅任務一步一步地達成。
嘉嘉去年6月宣布同林祖輝已離婚，嘉嘉一直對家庭生活都保持低調，不過呢日佢鮮有談及回復單身後，依然唔會忽略同一對仔女嘅相處，就算開直播到好夜，每日佢都堅持6點起身揸車送一對仔女返學，希望把握喺車程時間關心子女，真係一個廿四孝媽咪。
