服裝品牌太子爺 陳柏熹Harris 之前喺名人社交圈中相當活躍，不過近兩年突然變得低調，惹嚟外界唔少揣測。呢日Harris同屋企人舉行生日party時終於現身，仲邀請咗關之琳、何嘉莉、丁子朗等圈中好友出席，而Harris亦趁機交代自己因意外而毁容嘅經歷。
Harris指喺2023年8月23號，自己於深圳落車時，因為冇留意路面狀況，被送外賣嘅電瓶車撞到，當時左邊面回撞落保母車門，耳朵、左臉、肋骨等位置均告受傷，而左臉頰同鼻最為嚴重。Harris指現時最大分別應該係個鼻，意外後佢去咗睇一位嚴重意外矯形科醫生，Harris複述醫生嘅說話，指佢個鼻可以正常功能、起碼唔會影響健康就已經好好，因為醫生見過唔少咁樣撞傷嘅傷者都係抱憾終生。
Harris坦言自己都曾有氣餒嘅時間，做完矯形手術後會貪心，同時亦覺得辛苦，又唔知每次覆診後係咪需要再做手術，佢話喺呢個心理爭鬥嘅時間係最難捱。Harris指自己喺意外前好鍾意舉重，但意外後醫生叫佢唔好，因為谷力嘅時候，個鼻有機會會分開。
花費咗三百多萬、接受咗多次重建手術，但Harris面部有啲位置難以回復到意外前咁自然，幸好佢已經樂觀接受咗自己嘅不完美，佢又指而家自己仲係未可以擘大口，要等面上嘅支撐位置痊愈先可以，佢仲笑言需要面上有條明顯嘅疤痕，但用手遮住就得呀。
