44歲陳茵媺（Aimee）與老公陳豪喺2013年結婚，Aimee暫時淡出幕前，專心相夫教子，陳豪努力開工賺錢養家，仔女大咗，Aimee享受屬於自己嘅Me Time，多咗時間與網民互動，早前拍片回答網民問題，更指佢拍劇嗰陣唔知自己有咗，太博命演戲險出意外。
Aimee近日拍片分享與網民Q&A，有網民話睇咗5次《單戀雙城》，Aimee話《單戀雙城》係佢其中一個好鍾意嘅角色之一，有幾場戲係喊唔停，呢個角色係佢做媽媽之前拍嘅最後一套劇集，當時Aimee唔知道自己懷孕，因太博命演戲險出意外，有一場戲係佢要跌低，直到而家佢再睇嗰場戲會有啲驚。
Aimee陀第一胎時都差啲出過意外，Aimee懷孕五個幾月時仍會大住肚到處走，試過獨自揸車返大埔愛巢時，發生四車連環相撞意外，Aimee當刻感到不適，隨即被送往醫院接受診治，幸好大人與BB均無大礙，可算虛驚一場，老公陳豪得知意外亦心焦如焚，缺席原本要出席嘅活動，接愛妻返家休息，一切平安，有更多陀B經驗，Aimee三年抱三，育有兩子一女，一家五口生活美滿。
