杜德偉備戰紅館個唱，同時亦冇改近年每逢中秋演出嘅習慣。Alex喺中秋夜現身福建舉行嘅音樂節，喺台上一口氣連唱七首經典金曲。完騷後，Alex即趕返香港陪伴家人追月。
Alex話多年嚟嘅中秋都喺外地做騷，可能自己嘅歌啱呢個氣氛，今次參與嘅亞太音樂節，現場坐滿四萬多觀眾，佢一口氣唱咗七首歌曲，台下觀眾好熱情，Alex當作一次紅館演出前嘅預熱，完成呢個演出，返港就要專心準備2場紅館演唱會。
Alex喺騷上有歌迷嗌佢喺《風林火山》嘅角色「李文狄」，話初時對呢個名好陌生，究竟邊係「李文狄」，最後先諗起自己就係「李文狄」，Alex話：「呢個係我8年前演出嘅角色，自己差點也忘記。」
提到自己所飾演嘅大反派李文狄，Alex就分享咗一個紋身嘅小秘密：「有一場由於要赤膊上身，全身用咗4小時印上紋身嘅造型，點知當日拍攝完之後，先知道嗰啲紋身好難洗甩。由於第二日要做騷，現場化妝師同助理加上路人甲乙丙，現場好多對手幫手卸妝，用BB油抹到甩皮都未抹到晒，但對於呢個角色嘅造型，我係相當之喜歡，受一下皮肉之苦又如何呢！」
