郭富城 嘅全新《ICONIC》世界巡站演唱會首站於成都舉行兩場演出，城城一開場就以一身翡翠舞衣耀目登場，緊接演繹《Exit》、《我為何讓你走》、《信鴿》等歌曲。
唱到經典情歌《我是不是該安靜的走開》時，城城仲要求歌迷一齊合唱，歌手歌迷相互對唱，令台上嘅城城非常感動。
即將再為人員父嘅城城，之後又應大家要求，特別加跳Baby Shark版本嘅《對你愛不完》，佢走到延伸舞台邊，現場挑選一位歌迷齊齊對跳，剛巧兩晚被揀中嘅都係體型「壯健」嘅Fans，城城仲搞笑話：「要減肥一下才可以穿我的Tee恤啊！」隨後又再聯同舞者再熱鬧跳一次，帶動全場觀眾歡樂氣氛。
今次演唱會城城繼續台上作畫，唱跳《分享愛》時潑顏料作畫，作出彷似「芙蓉花」畫作，城城話：「希望一直可以做到：歌畫交滙、字舞相隨，成為我以後一個表演的方向，希望大家支持！」
今次演唱會亦特製一條城城成長歷程特效片，配合演唱《永遠愛不完》時作呼應，開場片段由城城幼稚園學生相開始，一直展現唔同階段成長路。
今次巡迴再邀請張叔平打造舞台服飾同視覺特效。除咗多套型爆舞衣外，背景視覺特效都經精心配置規劃，充滿後現代藝術感氛圍。