黎耀祥 同 張與辰 官仔骨骨現身馬來西亞舉行嘅「The Knights Award Season 4」，兩人分別獲頒發「Versatile King of The Stage & Screen（Hong Kong）」與「Breakthough Artiste of The Year （Hong Kong）」大獎，努力獲得肯定，祥哥同與辰都非常開心，尤其與辰今次可以話係衣錦還鄉。
祥哥笑言手上嘅獎係終身成就獎，因為馬來西亞嘅觀眾非常支持TVB嘅劇集，令佢喺當地都收穫大批劇迷，從而獲得呢個馬來西亞嘅終身成就獎。祥哥謙虛話唔敢同與辰同台合唱，又笑指自己唱嘅係老歌，當與辰話「中年好聲音」嘅歌手識唱好多歌時，鬼馬嘅祥哥話自己係「更年好聲音」。
一班辰粉悉心打扮到會場支持偶像，難怪與辰話家人以外，辰粉就係自己嘅發電機，因為有全心全力支持自己嘅粉絲，先令自己能夠企上台發光發亮。與辰又希望自己有一日能夠奪得「最佳男歌手」獎及「最佳作曲人」獎。
講到拍檔胡定欣出嫁，祥哥已即時傳短訊祝賀對方，對於定欣婚訊，佢都坦言感到突然，又計劃送驚喜祝福俾對方，但就保持神秘唔肯透露內容。
