中聲3唱將 占士丁丁 同音樂製作人 Eric Kwok 組成限定DJ組合「HOHO ONE」，佢哋第一站嘅演出就衝出香港，去到LA參加當地一個潑水音樂節，兩人為咗令演出盡善盡美，提早一個月拜師學藝，正式演出前亦好投入綵排。
正式演出時，喺當地讀書嘅XiX成員Kiele亦有到場支持Eric Sir，而當聽到現場播放XiX嘅歌曲，Kiele更興奮到手舞足蹈，不停大叫。
音樂節演出之後，兩位再去到當地一間知名夜店打碟，兩場演出都大受歡迎，丁丁同Eric當然覺得好滿足。Eric大讚拍檔丁丁好聰明，佢仲多謝太太Grace幫手，就連佢嘅愛犬菠蘿都有以特別嘅方式參與演出。
