薛家燕 早前去到馬來西亞雲頂為一個歌唱比賽總決賽任評審，家燕姐除咗有份選出獎項得主，仲同歌手 郭燕燕 以及比賽嘅八強選手一齊唱跳為比賽揭開序幕，一齊唱跳快歌《大日子》，而來自大馬嘅中聲3亞軍 張與辰 亦有受邀擔任表演嘉賓，相當受歡迎，與辰仲完美展示自己嘅唱功，獻唱梅艷芳嘅金曲《愛將》。
與辰同家燕姐大讚參加比賽嘅選手水準相當都高，加上適逢今年係歌唱比賽25周年，大會請晒歷年參賽嘅歌手大合唱，場面相當溫馨，喺台下欣賞嘅家燕姐都話想唱埋一份。 
呢次係與辰首次見家燕姐佢都話相當之興奮，與辰之前㨂咗家燕姐有份演出劇集《十月初五的月光》嘅主題曲《祝君好》出戰中聲，佢都話想同演Q姨嘅家燕姐合作一個新版嘅《祝君好》。而家燕姐亦即場邀與辰學跳十字步，希望可以一齊唱跳改編版《皆大歡喜》。
做完評審後家燕趕返香港同屋企人過中秋節，特別係準備咗一個燈籠同乖孫Julian玩，反而與辰留返喺大馬同自己嘅家人團圓。
