《女神配對計劃》雖然經已播出大結局﹐大家都緊貼留意住未能喺節目中配對成功嘅厘米CP 關嘉敏Carman 同 黃家俊Matthew 嘅發展動向，兩人喺節目後先開始深入了解， Matthew不時都公開向Carman示好。
最近兩人受邀作客 羅毓儀(Yuki) 嘅網上頻道，同Yuki嘅男友 林俊其 一齊拍片玩遊戲，Carman同Matthew互問對方問題，考雙方邊個了解對方多啲。 而Matthew就趁機示愛，其中一條問題係問Matthew最開心嘅時間，佢就直接話係見到Carman嘅時候，搞到對方怕醜到面都紅晒。 
最後Matthew勝出遊戲，換到一次壁咚Carman嘅機會，不過被壁咚嘅Carman就手足無措，當被要求講出Matthew五個優點時，大腦更變得一片空白，只係識不停掩面，唔敢直望Matthew。而Matthew繼續勇敢出擊，用眼神電暈Carman，嚇到Carman講完對方五個優點後即落荒而逃。
難得見到Carman展示少女般怕醜表情，網民估計處於曖昧期嘅兩人應該好快水到渠成。短片喺網上發布嘅同一晚，Carman亦於網上直播帶貨，即被網民逼攻追問佢同Matthew嘅發展，Carman直言兩人了解中，如果真係喺埋一齊會向大家公開。
期間佢仲透露咗厘米CP喺節目後，的確有嘗試約會，不過兩人約會嘅體驗似乎搞笑多於浪漫，Carman大爆有次Matthew帶咗佢去一間老式嘅美食餐廳用餐，點知有隻甴曱跌咗落Matthew身上，Matthew驚到大叫狂撥走身上嘅「小強」，而超級驚甴曱嘅Carman亦同時狂叫。另一次約會中，Matthew遇到一個奇怪大叔迎面撞佢心口，仲大讚對方大隻，令Carman哭笑不得。
