中聲2唱將 黃劍文(Kimman) 日前出發美國參加音樂佈道之旅，除咗喺機場獲大批Kimchi Family送機之外，去到美國嗰邊亦有唔少粉絲支持。Kimman連日嚟喺網上貼出靚相分享旅程點滴，佢都話好多謝喺美國嘅 Kimchi Family 揸六個幾鐘頭車從LA(洛杉磯)嚟到﹐ 亦都有朋友從西雅圖飛過去三藩市睇佢喺慈善音樂會演出。
完成咗三藩市嘅演出，劍文終於有時間去金門橋打卡，遇上好天氣，佢感恩表示有種夢想成真嘅感覺：「細個真係成日聽天氣報告講，三藩市多雲、大霧，好感恩今日畀我哋好好天，今朝早仲要去咗動物園 😎 yeah. 」跟住Kimman會飛去紐約繼續旅程，仲話靚相太多要遲啲再同大家分享。
比賽時曾經同Kimman傳緋聞嘅MISSY成員林思彤最近亦去咗日本參加花火祭，思彤除咗分享靚靚日式浴衣照，仲首度大方分享同男友嘅合照，但係怕醜嘅思彤用大大個貓貓貼紙遮住男友嘅樣貌。跟據思彤分享嘅相嚟睇，男友著住黑色Tee、身形微胖，故有網友留言留言表示「貓貓要減肥」，似係溫馨提示思彤嘅男友要減走幸福肥。
