戀愛真人騷《女神配對計劃》除咗捧紅五位女神，幾位求愛勇者同樣人氣急升，當中最成功嘅一定係GM曾展望啦！佢除咗收穫愛情，連事業運都水漲船高。10月12號係GM嘅28歲生日，有粉絲喺銅鑼灣租大型廣告板為佢搞生日應援，GM第一時間帶女朋友葉蒨文（Sophie）去打卡。
日前有粉絲目擊GM同Sophie現身廣告版前，二人雖然未有親密舉動，但就見到Sophie揸住電話，好認真咁幫男朋友搵最靚影相角度，不過GM喺個人IG post出嘅相，就唔見Sophie蹤影，只見到GM笑到四萬咁口揸住電話自拍，相信呢張相應該係出自Sophie之手啦！GM除咗感謝粉絲嘅用心，仲搞笑話有種被求婚嘅感覺。
再過兩日就係GM正日生日，亦係佢同Sophie拍拖之後嘅第一個生日，大家好期待Sophie為男朋友炮製咩生日驚喜，不過相信對GM來講，愛情事業雙豐收已經係最好嘅生日禮物啦！
