41歲嘅台灣影后桂綸鎂，一向氣質出眾，次次出席公開活動，造型都充滿仙氣同優雅氣質，不過日前佢現身巴黎時裝周，新髮型蘑菇頭捲髮搭配花恤衫，就被批評造型炒車，充滿大媽feel，更有毒舌網民話佢「40歲睇上去似65歲。」
其實小鎂早兩日已經喺IG post出呢一輯新造型嘅官方靚相，雖然睇上去消瘦唔少，但氣色不俗，不過隨後網上開始流傳網民野生捕獲嘅生圖，生圖中小鎂嘅膚色暗沉，短捲髮新髮型令佢嘅面形明顯變長，仙氣完全消失，取而代之係大媽feel。
雖然新造型引來唔少批評，不過亦有網民幫小鎂平反，話佢只不過係太瘦，亦有人歸咎係髮型出事，波浪捲短髮睇上去顯老。事實上小鎂上個月中先同日本男星西島秀俊出席釜山電影節，當時嘅小鎂面形較為圓潤，頭髮未剪短，絕對係顏值在線。
查實小鎂今次巴黎行，啱啱到埗時仲未「變髮」，喺IG中見到佢分別post出藍色同白色褲裝嘅靚相，雖然身形略瘦但精神爽利、仙氣滿滿，對照「變髮」後嘅花恤衫look，一夜之間老咗成20歲，完全印證造型對藝人有幾咁重要。
