莊思敏 日前同拍拖未夠兩年嘅圈外男友喺峇里島閃婚，作為Jacquelin好友嘅 吳若希 、 王海榛 都有出席婚宴，兩位仲把握時間到處玩，Jinny仲大曬泳衣相享受陽光與海灘。
Jinny喺社交平台連環出Post，先係曬出同新娘子合照，表示：「我仲未ready好～但我好開心，有人比我更加欣賞姐的好～將所有最好最靚嘅嘢都俾我姐～～因為你值得世間上最美好的人和事」。
跟住再分享喺黃昏下嘅靚相。一向鬼馬嘅Jinny再出咗條網紅轉場片，紀錄上山下海見識好風光一刻，當中更有泳衣造型添！不過Jinny就話：「結婚八周年，同另外一個男人玩死自己。上山下海乜都齊，攰到七彩。」亦讚嘆大自然奇妙，同埋話：「我終於知道，點解何生要喺結婚周年嗰日消失～可能就係知道行程太攰，所以扮晒嘢話簽證唔得～」
至於王海榛就成為得到Jacquelin花球嘅幸運兒，佢喺開心分享：「花球唔使搶咖，係你嘅就會自動嚟到你身邊。」又喺呢段幸福旅程中抽時間去當地嘅網紅鞦韆打卡，大讚工作人員提供滿滿嘅情緒價值，仲即刻喺手機幫手執相，連美圖時間都慳返。
