譚耀文 最近擔任選透節目《聲秀》導師，為一眾學員追夢出心出力，參賽《新秀》出道37年嘅佢近日亦實現夢想，舉行首個個人演唱會。喺三位《聲秀》學員胡港豐、布子殷與蕭凱恩，同數十位歌迷見證下舉行記招。
阿譚喺記招上感激大家支持，自己先有機會展開入行37年首個個唱，佢話：「成件事真係好夢幻，今日未行上台之前，感覺好似好陌生，但喺台上聽到大家嘅叫聲同歡呼聲，見到粉絲嘅支持，以及主辦單位同朋友好多好多嘅愛，回憶即刻返晒嚟，感覺這麼遠又那麽近，真係非常感恩。」
累積咗多年嘅演藝經歷，阿譚話歌單都構思咗好多年，有影視歌曲、有出道時嘅歌，亦有懷念部分以及向巨星致敬嘅環節，而家每日都練歌，過兩日就會開始緊密排練咁話。
主辧亦喺記者會為阿譚送上驚喜，搵嚟阿譚多位好友包括郭富城、鄭秀文、佘詩曼、張智霖、陳偉霆、梁詠琪、陶大宇、伍詠薇、陳煒、湯寶如、Locker林家熙、姚樂怡、鄭浩南、向海嵐、林熹瞳、何佩瑜、與及張繼聰同張振朗等拍片打氣。
大家力撐更令阿譚一度眼紅紅，佢話：「我其實個人好man ，但睇到咁多好朋友拍片支持送驚喜，真係無乜人會頂得住，哈哈！」三位《聲秀》學員更送上蜂蜜禮盒，等阿譚滋潤喉嚨，作為導師嘅阿譚仲會帶同佢哋一齊喺演唱會演出。
