林子祥 同 葉蒨文 紅館演唱會噚晚（11日）舉行第三場，除咗全場爆滿嘅觀眾，唔少圈中人都現身捧場，包括薛家燕、Eric Kwok、楊受成夫婦、俞琤、曾比特與女友、陳欣健、譚耀文夫婦、賈思樂等。
阿Lam同Sally全晚為觀眾帶嚟無數金曲，當Sally唱出《祝福》同《福氣》時，舞台飛出三隻遙控蝴蝶，喺半空中拍翼飛舞，LED翅膀加上舞台燈光照射下，閃閃發光，猶如真蝴蝶咁生動，再配合《祝福》溫馨感人嘅歌詞，營造出極度浪漫氛圍，全場觀眾頓時被呢幕意想不到嘅畫面吸引。呢個精心設計嘅舞台效果，為經典金曲注入新生命，成為全晚最令人難忘畫面之一。
第三場繼續為觀眾帶嚟驚喜彩蛋，歌單加插《情人知己》。講到全晚最冧爆嘅畫面，絕對係演唱《我愛你》時，舞台兩側噴出印有「白頭到老」四個大字，紅、白心心並有阿Lam及Sally簽名嘅彩紙，整個紅館下着「愛心雨」，浪漫升級，甜蜜滿瀉。其實第二場尾聲已經噴過阿Lam及Sally的得意公仔彩紙，今次再玩新意，令觀眾驚喜萬分。
