曾樂彤 同音樂人 徐浩 12號正式註冊結婚，晚上舉行盛大婚宴，一對新人傍晚現身接受訪問，更應傳媒要求多次咀嘴，不過新娘子親吻老公時就顯得有啲怕醜面紅，要老公為佢撥涼散熱。
一對新人受訪時，徐浩就自爆自己喊得仲多過老婆，而曾樂彤就話自己都有喊，但係老公就喊得好誇張，所以好難同對方媲美。
徐浩指早上接新娘時，當佢講出「愛的宣言」時，自己只係講到老婆個名頭兩個字，就已經忍唔住喊，最後仲要趴埋個櫃度畀自己冷靜一陣先停到，訪問時徐浩仲搞笑咁反問太太當時聽到幾多成。曾樂彤就話老公呢段獨特嘅「愛的宣言」，除咗自己可以聽得明外，其他人睇片時應該會係覺得聽緊外星文。
講到宣言中最Sweet嘅一句，曾樂彤指由於佢同徐浩唔係成日見到面，大家相處嘅時間好珍貴，所以有時一啲生活嘅小細節，例如徐浩整理緊自己時，曾樂彤為對方遞上毛巾，而喺佢哋嘅「愛的宣言」中，就有提及呢啲生活小細節。徐浩指一段婚姻、一段關係，好平淡嘅相處就係最值得嘅。至於問到婚後係咪會畀晒啲錢太太？徐浩豪氣表示晨早就已經畀晒對方任用喇。
提到早上玩新郎環節，徐浩除咗感謝兄弟團幫佢頂咗好多外，仲趁機放閃，指其中一個Game要喺眾多五官入面砌返太太個樣出嚟，佢嘴甜咁話太太對眼咁樣，自己一認就認得出，令在旁嘅曾樂彤尷尬到即刻打斷，唔畀老公再講落去。至於問到會唔會盡快製造屬於佢哋嘅結晶品出嚟？曾樂彤先話佢哋嘅結晶品就佢二人嘅作品，而徐浩就指一切隨緣。
由於二人嘅工作都相當忙，所以一對新人都話冇Plan蜜月旅行，徐浩笑言可以撞正兩人都有時間，唔排除會快閃蜜月旅行。而曾樂彤就話最有機會嘅，係一齊出席好友 Yanny陳穎欣 嘅婚禮。
呢日出席婚禮嘅有 蔡卓妍 、 吳千語、張繼聰 同太太 謝安琪、周柏豪、陳柏宇、衞詩雅 與老公 周祉安 等。
喺社交平台發肉麻文祝福曾樂彤嘅阿Sa，就表示見證咗曾樂彤唔少人生經歷，所以相當感動，不過佢就話睇到徐浩接新娘時喊，自己就忍唔住笑到喊喇。問到阿Sa搶唔到花球會唔會好失望？佢就話自己已經試過，要留返啲機會畀啲未體驗過嘅人。周柏豪則大爆一對新人私底下冤氣嘅時刻。
