台灣演員楊祐寧12號喺限時動態，以黑白握手照悲傷地透露，楊爸爸於凌晨病逝消息，終年71歲。祐寧於相中寫道：「昨晚我們才跟他述說我們的愛，彼此親吻，擁抱，今天凌晨，父親已經安息主懷了。」
祐寧嘅姐姐於13號凌晨，亦發長文悼念爸爸，以及訴說楊爸爸入院以嚟三個幾月嘅經歷：「最後一週是千言萬語在心中編織擺盪，欲言又止。 我們講了三個多月的話，從每晚火熱的禱告，聖經故事，充滿信心，到漸漸語塞，發現自己言不及意，不夠誠實。因為那最重要的總是卡在喉嚨，而最後想講的，以為是愛，其實更多是抱歉。」祐寧姐姐傷感表示，從此之後，自己再冇一個可以畀佢任性嘅後盾，佢必須做一個講理、懂事、堅強嘅人。
楊爸爸於今年6月去日本旅行時突然肚痛，返到台灣檢查後發現係癌症末期，由於呢3月多月入面，楊爸爸都食唔到嘢，只可以靠吊鹽水維生，所以消瘦得相當快，令人相當心疼。而自楊爸爸入院後，由楊媽媽與祐寧姊姊輪流照顧，而祐寧每逢有空檔都會到醫院陪伴爸爸，逗留到凌晨先離開。上月祐寧孻仔Eli出世，祐寧更喺BB出院後第一時間抱畀爸爸睇。
今年8月踏入43嘅祐寧，喺三個月內經歷爸爸確診、囝囝出世以及摯親離世，大家都擔心佢會受唔住打擊，祐寧嘅經理人回覆傳媒時表示：「很平安，家人都陪在旁邊，感謝關心。」至於祐寧會否如常出席18號嘅金鐘獎，經理人則指暫時無更變行程。另外，曾寶儀亦貼出與楊爸爸嘅合照，悼念呢位長輩，並表示會想念對方嘅一切。
