曾樂彤 同音樂才子 徐浩 於12號舉行婚禮，一對新人喺鏡頭前大方錫錫騷恩愛。徐浩自爆喺接新娘環節，講愛的宣言時喊到收唔到聲，需要冷靜過後先可以再講。不過玩砌相遊戲，徐浩就輕鬆過關，佢仲話：「未見過一個人嘅雙眼係咁靚。」氹到老婆好開心。曾樂彤都唔輸蝕，話自己都可以砌得返老公，又大讚老公五官標緻易認，兩公婆一來一往放閃，又互戴高帽讚對方，真係Sweet到爆。
婚禮眾星雲集，有好多圈中朋友前來祝賀，包括蔡卓妍、吳千語、張繼聰謝安琪夫婦、衛詩雅同老公周祇安、關智斌、周柏豪、陳柏宇、陳蕾、Gin Lee、泳兒、艾妮、馬天佑、吳肇軒等。
阿Sa婚禮前夕特登幫曾樂彤搞咗個派對，慶祝好姊妹出嫁。當大家以為阿Sa係接花球嘅熱門人選時，阿Sa就話自己主動放棄，將呢個機會讓俾更有需要嘅人。阿Sa同千語亦讚曾樂彤係一個好識談戀愛，頭腦清醒嘅人，所以唔需要佢哋教，反而阿Sa被好姊妹點醒好多次添！
阿聰同Kay以及Michelle同老公周醫生呢兩對恩愛夫妻，婚姻資歷相差近20年，兩對都有唔同嘅婚姻心得。阿聰就話每對夫妻相處唔同，所以婚姻之道要自己研究，最好就係觀察身邊朋友。如果朋友經常被老婆鬧，就要觀察朋友係做咗咩而被鬧。至於Michelle同周醫生就話，佢哋都係新婚冇耐，所以都學緊婚姻之道。
柏豪同Jason雖然已經係幸福爸爸，但講到生仔秘訣，柏豪笑言叫一對新人自己上網搵，因為自己當年就係咁做，仲話開心最重要，所以喺咁開心嘅日子，一對新人一定會造人成功。
