郭晉安主演嘅新劇《金式森林》噚晚（13日）喺翡翠台正式播映，喺第一集尾段時，安仔飾演嘅方仰天同陳曉華飾演嘅林澄遇上交通意外。
拍攝呢幕私家車翻車場面，劇組動用大量人力物力，先將私家車裝上巨型旋轉架上，安仔同Hera就喺車廂中拍攝私家車翻滾畫面，隨後再安排拖車將私家車喺馬路上翻滾拖行。
安仔同Hera事前都做足準備，劇情講述安仔奮不顧身以身體保護Hera，未埋位前，安仔經已不停練習，務求喺車廂翻滾情況下仍然做出逼真效果。Hera上車前更拉筋熱身，不過佢嘅拉筋動作完全拍得住專業特技演員。
真正埋位時，兩人都要連人帶車喺空中翻滾多次，Hera拍到頭髮亂了，安仔就成身大汗，望到都覺得辛苦。接住兩人又要拍攝Hera拖住暈咗嘅安仔，喺私家車爆炸前飛撲脫險畫面，幸得台前幕後充份合作，加上做足安全措施，令整個翻車畫面拍攝成功。