長居泰國嘅《冲遊泰國》主持胡慧冲 （Roger）最近上載新片，Roger返港請到冬蔭表姐阿Yen同《中聲3》30強、被封「溫柔殺手」嘅豬農唱將胡家健作客短片，一齊去旺角覓食，忽然以「細佬」稱呼胡家健，雖然兩人係姓胡，但係家健喺比賽時從未公開跟Roger有親屬關係！
片中見二人言談間相當客氣，又唔似好熟絡，喺大家以為呢個係節目效果嘅時候，經過一輪介紹美食嘅內容後，終於播出彩蛋，Roger同家健入錄音室錄合唱歌，後來Roger解釋其實佢同家健係堂兄弟關係。
Roger呢次返港特別為堂細佬家健打造新歌，將《夜思》重新填詞，創作新歌《冲家聲》，歌詞亦為家健度身訂造，加入中聲參賽經歷，透露呢首歌仲有家健嘅獨唱版本，更能突出佢個人嘅唱歌技巧，希望堂弟有個人作品，以後登台有個人單曲唱，呢首歌一曲走天涯。
家健收到呢份禮物，大讚歌曲旋律優美又易上口，Roger仲帶家健去專業歌手採用嘅錄音室度錄歌，令家健大開眼界，Roger希望有機會同堂細佬以「二胡組合」演出。
