姚焯菲（Chantel）同李克勤大仔李立仁（Ryan）近日傳出緋聞，雖然佢哋都係紐約大學大一新生，不過就唔同學系，有指二人係因為有共同導師先認識，喺開學前已經成為朋友。
Chantel嘅大學生活多姿多彩，仲做咗一個名為《CHANTEL's GAME SHOW︰〈廣東話估歌仔〉in New York》嘅系列片，邀請不同國籍嘅同學一齊玩，而第一集嘅其中一位攝影師就係Ryan，令兩人嘅緋聞傳到似層層，搞到Chantel開Live時都被粉絲追問佢同Ryan嘅關係，令佢都要認真澄清一下！
Chantel分享喺學校識到好多新朋友仔，而佢覺得自己同Ryan嘅緋聞好奇怪，自己都有Send俾Ryan睇，亦同對方講：「有人有啲誤會。」又強調二人只係朋友關係。不過當Chantel回答「最掛住香港邊款美食」嘅問題時，佢自揭喺唐人街食咗好好食嘅菠蘿叉燒包，令佢諗起香港味道，亦推薦朋友去食。但巧合嘅係，有眼利網民發現，Ryan都喺社交平台分享過一個菠蘿叉燒包，令大家懷疑Ryan係同Chantel一齊去食。
