「胡說八道會」成員胡蓓蔚、胡杏兒、胡定欣、黃智雯、姚子羚及李施嬅一向姊妹情深，胡定欣於今個月初宣布與醫生男友陳健華結婚，目前姚子羚及李施嬅仍係單身，44歲李施嬅與健身教練車崇健 (Anson) 今年初突解除婚約，宣布8年情告終，二人分手近一年卻一齊參加內地真人騷《再見愛人》第5季，盛傳復合有望，李施嬅更喺節目爆喊訴說分手原因！
李施嬅於2021年2月開心分享男友求婚成功，待嫁嘅準新娘繼續忙於工作，今年2月無預警宣布分手，李施嬅喺噚日播出嘅首集，爆兩人分手嘅導火線係自己做4次手術，前男友全程缺席，更爆喊質問舊愛，李施嬅強調仍愛著車崇健 ，但佢好怕再次受傷。
李施嬅與舊愛喺節目展開為期18日嘅旅行，透過彼此再次相處，尋找挽回戀情嘅解決方法。李施嬅提及於2022年因免疫系統出現問題，佢需要接受眼部手術，卻因醫生斷錯症，一共做咗四次手術，雙眼唔能夠回復以往狀態，李施嬅曾害怕以後冇辦法再做演員，更指車崇健當時未有陪伴，李施嬅只係一個人睇醫生、一個人去做手術，
李施嬅喺節目中表示：「有一次我真的崩潰哭了，我就說我恨你，我覺得我跟你一起，但是我很孤獨，怎麼可能我花這麼多錢去做手術看醫生、沒有工作，你怎麼可能不問我有沒有，就是金錢上有沒有需要幫忙？這個傷害真的太深，那個時候我覺得他應該不可以跟我走得很遠。」車崇健認為李施嬅當時自己可以做到，對於冇陪伴對方，佢係感到非常內疚。
李施嬅又指2021年車崇健求婚成功，原來佢哋曾傾過結婚，李施嬅講過自己喜歡嘅鑽戒款式，但車崇健求婚時買嘅戒指，完全唔係李施嬅想要嗰款，聽到李施嬅講出心聲，車崇健一臉尷尬，其後李施嬅有讚車崇健努力工作，同時教識佢好多，更指以前嘅自己係戀愛腦，跟前度一齊後學懂點樣堅強獨立，大家彼此有付出有愛過。
李施嬅對呢份感情仍有留戀，佢唔肯定之後會發生咩事，又或者會畀呢個人一個機會，但李施嬅知道要畀呢個人機會，自己要打開一道門，讓自己重新再受傷，當主持人問佢會唔會保留一絲復合嘅可能，李施嬅頓時雙眼通紅表示害怕。 網民睇完第一集就表示心痛李施嬅，勸佢唔好復合，又指做手術都唔陪伴，同單身冇分別，認為不被愛唔會幸福。
