出道以來就留有一頭長髮嘅 黃妍，往往予人一種「文青」同「純情」形象，不過今次由林奕匡同Key Ng共同作曲、黃偉文填詞嘅新歌〈其實我 不是那麼的純情〉，就一改Cath嘅面向喇。
Cath介紹新歌時﹐解釋作品係講述一個外表睇落純情，但內心其實曾受重傷。當再次遇到令自己心動嘅人時，心底對追求愛情嘅掙扎。佢仲提到一見到Wyman為新歌所題嘅歌名時就眼前一亮，又感謝佢繼去年嘅〈咖啡 鴛鴦 奶茶〉後，再以歌詞將自己更多面向展露於樂迷面前。
Cath 為今次新歌宣傳同拍攝MV更有「大犧牲」，佢將長髮剪短又染成淺金色，以截然不同形象示人。Cath坦言自己一直都有剪短頭髮打算，今次就獲MV導演要求，令佢終得嘗所願。佢仲話非常滿意，更認為新形象更可以帶出歌曲中嘅成熟韻味。
今次 MV 拍攝為帶出〈其實我 不是那麼的純情〉中那份悲情與人的自我掙扎，團隊特意搭建出雪山場景，為求以冰天雪地營造出淒美、孤單效果。作為 MV 主角的 Cath 在拍攝過程中，即使當日是炎夏，亦需穿上長袖厚衣，令 Cath 在拍攝過程中不禁大汗淋漓地大叫：「我而家係全身濕晒！」雖然拍攝過程辛苦，不過Cath認為只要MV能帶出歌曲中情感，一切都值得。
MV仲有狗演員Lucky參與，身為愛狗之人嘅Cath提到呢位「對手」就非常興奮：「我見到Lucky就即刻『摟』佢傾偈啦，但係佢請我食咗好多次『檸檬』！我對住佢唱歌佢仲擰歪面！」雖因而經歷多次NG，不過建立信任後好快就拍出理想效果。
推出新歌之餘，Cath下月就會帶住自己嘅音樂到到東京，為巡迴音樂會寫下終章，緊接PER SE嘅演出後，於東京「青山月見ル君想フ」舉辦音樂會日本站。