44歲視后胡定欣今個月初宣布跟外科醫生男友陳健華（Akin）於新西蘭南島嘅皇后鎮拉埋天窗，好友紛紛隔空祝福，定欣結婚場地位於新西蘭的皇后鎮，舉行Elopement Weddings，一場專屬於兩人嘅婚禮，俯瞰整個瓦納卡湖，定欣婚禮非常秘密，連閨密胡杏兒都話唔知情，之不過前日黎耀祥老婆Julia喺網上大曬四人喺皇后鎮聚餐嘅合照！
黎耀祥曾同定欣八度合作拍劇，二人友情深厚，佢與老婆Julia恰巧喺皇后鎮，即跟定欣及其新婚老公Akin相聚，第一時間親身送上祝福。祥嫂Julia喺社交平台貼出晚餐合照，表示珍貴呢個開心晚餐時刻，而定欣回應：「能夠同時岀現喺Queenstown（皇后鎮），仲可以一齊食飯，呢個機率真係…….😆🤪開心！謝謝嫂子阿祥，還有姪女！❤️🙌。」該合照由定欣揸機自拍，眾人笑得非常開心。
定欣結婚喜訊成為全城熱話，原來呢位新婚人妻拍TVB節目《家傳之「保」》亦談及隨時升呢做人母，定欣喺該節目中罕有講生小朋友計劃，直指小朋友係「上天嘅禮物」，希望將來小朋友能好似自己咁無後顧之憂去追夢，而胡媽媽亦披露揀女婿條件就係「有愛心」同「穩重」，完全係定欣老公具備嘅優點，估計胡媽媽都好滿意呢位女婿。
