陶喆 嘅世界巡迴演唱會最新一站去到澳洲悉尼同墨爾本，David帶埋太太同囝囝同行，一家三口提早到埗，爭取時間享受家庭樂。
David嘅囝囝Bon Bon今年6歲，之前都試過陪爸爸巡迴開騷，今次David第一次到悉尼開騷，一家三口同行，齊齊打扮休閒喺街上漫步，享受風和日麗嘅悉尼風光，相中見到著名景點悉尼歌劇院，父子仲隨性席地而坐，一家人齊齊大嘆美食，非常開心。
David同太太Penny對Bon Bon一向非常保護，從未公開過阿仔嘅正面相，一家三口同框嘅相，都會遮住阿仔嘅樣，今次難得見到阿仔側面，同David確實好有父子相。
網民紛紛留言大讚David一家人好有愛，仲有唔少粉絲希望David可以多啲分享家庭相，等大家可以了解更多偶像私底下嘅生活。