入行40年嘅 杜德偉 喺紅館舉行一連兩場演唱會，吸引唔少圈中朋友捧場，好似有容祖兒、梁家輝夫婦、鍾鎮濤同太太范姜、顏志恒、羅啟豪、李佳、曾志偉、上山詩鈉、余安安等，當然唔少得Alex嘅太太同埋囝囝啦。
相隔十年再踏紅館舞台，Alex型爆登場，以連串快歌揭開序幕。咁耐無喺紅館開騷，Alex都情不自禁鍚下舞台。雖然Alex已經63歲，但佢依然唱得跳得仲脫得，著上透視裝嘅Alex，fit爆嘅body若隱若現大唱《脫掉》，Alex仲改埋歌詞，叫台下嘅家煇哥脫掉，台上台下都熱血沸騰。
雖然呢次Alex個唱，大部分都係以快歌為主，但其實佢有唔少深情嘅慢歌，都令人聽到如痴如醉，好似《天生喜歡你》就真係冧爆喇﹗而呢晚Alex更請嚟相識超過30年嘅好友 林志穎 做嘉賓，小志嘅驚喜現身，勾起大家90年代小旋風嘅回憶殺，佢哋仲合唱《不是每個戀曲》。
小志表演完後，亦返回座位繼續欣賞Alex嘅演出，佢更把握機會同家輝哥同埋Joey閒聊咗一陣，Joey同家輝哥都話小志嘅出現令佢哋好驚喜呀。
