歌唱節目《聲秀》9強嘅其中四位學員：蕭凱恩、布子殷、周智敏、穎喬，呢日作客《StarTalk》接受主播 許文軒 訪問。平時唱開音樂劇歌曲嘅蕭凱恩，表示參加《聲秀》後可以挑戰唔同嘅曲風，係一個幾新嘅嘗試。把握最後機會參加選秀節目嘅穎喬，表示自己受媽媽影響而鍾意唱歌，更揚言嗰種熱誠比媽媽更甚！不過穎喬指當初報名時，自己就先斬後奏，未有特別話畀媽媽知，等對方自己發現，不過穎喬話相信媽咪都會支持自己嘅。
至於布子殷為圓夢參加比賽而延遲入讀大學，佢話好彩得到家人嘅支持，畀佢去行屬於自己嘅路。同樣得到家人支持嘅周智敏，直言比賽過程真係好恐怖，佢指自己外表雖然好鎮定，但係其實係一個容易受傷的女人。
面對隊員被淘汰，布子殷表示真係忍唔住哭成淚人，雖然大家交情唔算深，但當見到有學員離開舞台，都會有種好唔捨得嘅感覺。蕭凱恩話喺拍攝過程中都遇過好頭痛、身體不適嘅時候，但係學員間互相鼓勵同放鬆，係可以令呢啲問題一掃而空。
訪問期間Edmond同佢哋玩咗個小遊戲，等觀眾可以更了解四位學員。布子殷大讚蕭凱恩識得自彈自唱，絕對係天賦，另外佢又好欣賞穎喬嘅台風，尤其係眼神非常堅定，笑言要多多向穎喬學習。
問到佢哋「如果要同其中一位學員交換啲嘢，你最想得到嗰位學員什麼東西呢？」蕭凱恩就話要同最大眼睛嘅學員交換三十分鐘，因為好想睇下自己父母，嚟睇自己比賽，又想可以對住譚耀文唱歌。
另一條問題就係「會揀邊位學員陪你流落荒島一個月？」穎喬話參加《聲秀》最大得著係認識周智敏，因為大家係外型穿搭方面style都好接近，加上每一round比賽，都令大家嘅感情更深，而家兩人已經係形影不離。
最後一條問題問到大家「最驚導師嘅一樣嘢？」周智敏話佢最驚見到胡鴻鈞掩臉掩頭嘅小動作，代表佢對自己嘅表現有不滿，不過雖然係咁，但係佢亦有好玩得嘅一面，感覺好似一個朋友咁。