何超蓮與內地男星竇驍喺2019年公開認愛，拍拖4年後喺峇里舉行婚禮，二人因工作忙碌而聚少離多，曾多次傳出婚變，超蓮曾親自去探班，為竇驍送湯水，又結伴睇鄧紫棋演唱會，超蓮近期喺綜藝節目亦透露備孕計劃，點知向太陳嵐近日揞名爆富家女與男演員鬧離婚，更指「下嫁是滅亡之路」，不少網民即把矛頭直指超蓮與竇驍，婚變傳聞再次登上熱門搜尋。
向太噚日分享一條新影片講「富家女和男演員鬧離婚」，並沒指名道姓，只係講某位富家女下嫁男演員後，由於富家女屋企「閂水喉」，二人正在鬧離婚，直指男演員為錢而娶富家女，即便知道婚後演藝事業恐受影響，仍心存僥倖，以為能婚後獲得財務保障，曾向老婆索討人民幣8000萬元等，之不過婚後女方家庭未提供任何經濟援助，連房產都只登記喺女方名下，由於男方散盡家財辦婚禮，於婚姻得不到任何好處，花費至今仍賺唔番，疑生活與心理壓力倍增，直言二人「在鬧離婚」，向太感嘆：「以為娶進豪門能少奮鬥幾年，最後反而更辛苦。」
向太強烈建議女生寧可高攀，不要下嫁，稱雙方家庭背景差異大，並非門當戶對，「下嫁是滅亡之路」，存在解決唔到嘅問題：「男人的自尊心跟自卑感，你是解決不了的問題。」影片上載冇耐，超蓮與竇驍嘅婚變傳聞即上熱搜，事緣二人婚禮從場地選址、佈置設計、流程安排到伴手禮挑選，幾乎全部由竇驍親自策劃及執行，竇驍甚至喺婚禮前一星期獨自飛抵當地，超蓮受訪時表示對婚禮具體安排完全唔知情，直到婚禮當日先第一次睇現場佈置，感動到當場落淚，完全由竇驍為超蓮打造世紀婚禮。
向太今次爆料並冇指名道姓，只係講出案例，因此以上僅為網民猜測討論竇驍及超蓮「鬧離婚」，衍生話題更有「竇驍為了婚禮掏空家當」、「竇驍還在還婚禮的債」等！
